Login
Wat is blots mit de Vogels los? Se schient keen Lust to hebben, sik een Neist to boen un Junge optoteien. Nix los bi de Nisskassens, de ik an‘t Hus, an‘ Stall un in‘ne Bööm hungen heff. Egol, ob Oldbau, schönet Eenfamilienhus oder Luxuswohnung: De Vogel kiekt sik de Wohnungen kott an, fleegt den over wieter.
So kenn ik dat nich. Wat hebbt sik de Lünnen un Meisen fooken üm een Nisskassen kappelt. Nu ist dat ruhig. Lange Tiet heff ik dacht, dat liggt an dat koole Weer. Dat de Vogels keen Lust harrn, sik op de Eier to setten, wenn dat noch nich noog to freten gifft. Nu hebbt wi Mai, un de Meesen, Lünnen, Roodbost, Tuunkeunig un Kranzvogels schient jümmer noch lustlos. Ik kann mi nich verkloren, woran dat liggt.
Dor fallt mi op: Ik tööv ok jümmer noch op de Treckvogels. Ik heff noch keen Rotsteert, keen Ackermann un keen griesen Flegenfanger sehn. De Tuunsinger un de Goldborst fehlt ok noch. Hebbt se sik verflogen? Sünd se in Ofriko bleeven? Oder heet jüm een Süük den Dood bröcht? Ik weet dat nich. Ik kann mi nich besinnen, dat dat in‘ Fröhjohr so still bi mi ween is.
Ok de Lünnen sünd wech. Dree, veer Nisskassens hebbt se jümmer in Beschlag nommen. Ik heff noch keen Spatz, so heet se jo op Hochdüütsch, sehn, de ne Wohnung söcht hett. Ok an‘ Fudderhus duukt blots af un to mol een op. Sünst weer dat jümmer een ganzen Trupp. Wat is blos los? Wi is dat bi jo? Wat hebbt ji beleevt?
NEWSLETTER
